Main Pahalgam hamle ki gehraai se ninda karta hoon. Ye ghatna sirf ek hamla nahi thi sochi samjhi saajish thi, ye hamare bharose par, hamari ekta par, aur hamari insaniyat par hamla tha. Jo log us din Pahalgam mein apne parivaar ke saath sirf ek chhuti manane gaye the, unhone shayad kabhi sapne me bhi nahi socha hoga ki wo apni zindagi ka aakhri safar tay kar rahe hain.
Wo sab log bahut maasoom the. Unka kasoor kya tha? Sirf itna ki unhone apne rajya,shahar, apne ghar se nikal kar nature ke kareeb kuch waqt bitane ki sochi? Kya insaan ka khul kar jeena, bina darr ke jeena ab ek sapna ban gaya hai? kya hindu dharm kaa hona gunah hai?
Har baar jab koi aisi ghatna gaht ti hai, hum kuch waqt ke liye sadma jhelte hain, kuch tweets, kuch news debates,kuch mombatiya, kuch naare aur phir zindagi waapas pehle jaisi ho jaati hai. Lekin jin par guzarti hai, unke liye sab kuch waapas pehle jaisa kabhi nahi hota.
Sabse dukh ki baat to ye hai ki aise hamle sirf logon ki jaan nahi lete, balki dharmon ke beech ki ek ummeed, ek soch – ki hum sab ek hai – usse bhi tahas nahas kar choth pahuchate hain. Hindu ho ya Muslim, ek maa apne bete ko khoti hai to dard ek jaisa hi hota hai. Ek pita apne bachchon ka haath thame bina chala jata hai, to wo peeda/pain kisi bhi dharm ka ho, insani hota hai.
Humein sochna hoga – kya humein aisi duniya chhaiye apne bachchon ke liye jahan log sirf isliye maar diye jaate hain kyunki wo kisi jagah ghoomne gaye the? Kya itna bada kasoor hai ghumna? Jeevan jeena? Khush rehna? yaa hindu dharm kaa hona?
Main ek aam bharatiya hoon. Koi neta nahi, koi celebrity nahi. Lekin mere dil mein bhi dard hai, gussa hai, aur ek sawaal hai – ye sab kab tak? Kab tak hum aise hi marte rahenge? Kab tak insaniyat dharm ke naam pe har baar haar jaayegi?
Main sirf dua kar sakta hoon ki jo log iss hamle ki chapet me aaye or aaj hamare bich nahi hain, unki aatma ko shaanti mile, aur jo bache hain – unke liye hum ek behtar, zyada insani, zyada insaaf wali duniya banayein.
Pahalgam sirf ek jagah ka naam nahi, ek tasveer hai us Kashmir ki jo kabhi jannat kaha jaata tha. Umeed hai, ek din fir wahi jannat wapas aayegi. Jab log bina darr ke, bina bhedbhaav ke, ek doosre ke saath jee sakein.
Pahalgam mein hua hamla har bharatiya ke dil ko chhir gaya hai. Itna dard, itna nuksan… aur sab kuch bas ek pal mein. Main aaj bhi us khabar ko sochta hoon to aankhon mein aansu aur dil mein gussa dono aate hain. Lekin iss waqt mein, main ek baat zarur kehna chahta hoon – mujhe apni sarkar par, apni army par poora bharosa hai.
Main janta hoon ki humare desh ke rajneta aur suraksha bal kisi bhi ghatna ka jawab dene mein kabhi peeche nahi hate. Par jab pura desh aakrosh se bhara hota hai, tab shaanti se sochna aur bhi zaroori ho jata hai. Aise samay par bhadakna aasaan hota hai, lekin ek samajhdar aur ekjut desh banaye rakhne ke liye humein soch samajh kar kadam uthana hoga.
Ye sirf ek terror attack nahi tha, ye ek challenge tha humari soch, humari ekta aur humare bharose ke liye. Aur mujhe poora yakeen hai ki humari sarkar iss par sirf bayan nahi degi, balki strategically kaam karegi, jaise hamesha karti aayi hai. Jawab milega, par soch samajh kar milega – taaki kal koi maa apne bachchon ko Kashmir ki khoobsurti dikhane le ja sake, bina darr ke.
Main khud ko rok nahi paata jab kisi maasoom ki maut ka sochta hoon, lekin main itna zaroor janta hoon – humein mil kar aage badhna hoga. Nafrat se nahi, ekta se. Hamare veer jawanon ka balidaan hamesha yaad rakha jayega, aur in maasoom logo ki jaan ka hisaab bhi zarur liya jayega.
Aaj zarurat hai shaant dimaag, ekjut samaj aur sahi faislon ki. Kyunki yahi ek tarika hai is andhere se roshni tak pahuchne ka.
Mujhe bharosa hai. Desh or sarkar jaanti hai, kaise jawaab dena hai.
– Ek Aam Nagrik, Ek Bharatiya, Shaant Par Sajag
: